KRALENDIJK – Nashonnan Uní a proklamá dia 10 di mart 2022 komo e promé Dia Internashonal di Hues Muhé. Riba e dia aki – i tur aña riba e fecha aki – mundialmente ta i lo duna atenshon na e partisipashon igual di hende muhé riba tur nivel di poder hudisial.

Korte Komun di Hustisia di Aruba, Kòrsou, Sint Maarten i di Boneiru, Sint Eustatius i Saba por i ke ta un ehèmpel tambe pa hende muhé den sistema hudisial. Korte a konosé presidentenan femenino i aktualmente mitar di nos huesnan ta hende muhé.

E representashon di hende muhé den sistema hudisial ta importante pa diferente motibu. E no ta sòru solamente pa desaroyá e sistema hudisial, siendo un reflekshon di e komunidat i kaminda komunidat por rekonosé su mes aden, pero tambe e ta inspirá e generashon aktual i e siguiente generashon di huesnan muhé i tur sobrá hende muhé den komunidat.