ORANJESTAD – E aeroliña ku preis abou Dominikano Arajet ta bula entrante djabièrnè 16 di sèpèmber ku dos buelo pa siman entre Santo Domingo i Aruba pa un preis spesial. Arubianonan por bula pa 168 dòler ida i buelta, ku impuesto inkluí. 

E aeroliña ta bula ku un avion 737 MAX-8 nobo nobo ku tin un kapasidat di 185 pasahero.

Orario di buelo

E kompania ta bula 12.50’or bai Aruba riba djaluna i djabièrnè i ta yega 14.10’or. Despues di un parada di tres kuartu di ora e avion ta bula bai Santo Domingo bèk pa 14.55’or i ta yega 16.20’or.

Arajet ta start ku sinku avion, Boeing 737 MAX-800 kompletamente nobo. Segun Arajet esakinan ta avionnan state-of-the-art ku ta diseñá pa ta bon pa medio ambiente, ku djeskuater porshento ménos uso di kombustibel, kompará ku mayoria avion ‘single-aisle’, di manera ku e aeroliña por spar riba kombustibel, mantenshon i gastunan operashonal.

Arajet ta spera di por bula destinashonnan importante den Norteamerika i Suramerika, ku e promé destinashonnan manera Colombia, Peru, Mexico, Costa Rica, El Salvador, Guatemala, Aruba, Sint-Maarten i Kòrsou.

Den futuro i segun ku agregá mas avion na e fleta, e kompania ke agregá rutanan di estadonan den norte di Estados Unido te Brasil.

Arajet

A lanta e kompania di aviashon na final di 2014 komo kompania di charter Dominican Wings lokual a bira despues Arajet. E kompania di aviashon ku ta establesé na Aeropuerto Las Americas na Santo Domingo, tin awor su Sertifikado di Operadó Aéreo, ku el a optené di outoridat di aviashon sivil di Republika Dominikana. 

E kompania ke transportá e próksimo sinku añanan mas ku shete mion pasahero pa aña. Informashonnan di Planespotters.com ta mustra ku for di ougùstùs e flota di Arajet ta konsistí di kuater avion Boeing 737 MAX-8, di kual dos nan a hür di Griffin Global Asset Management.