WILLEMSTAD – E sistema di wer tropikal Invest 98L a yega Laman Karibe awe madrugá, pero no a sera ainda. Esei ta debí na bientunan den e nivel di mas haltu, ku ta frena e desaroyo pa bira un depreshon tropikal i despues asta un tormenta segun e sentro di orkan na Miami.

Sea kual sea e desaroyo e meteorólogonan ta antisipá yobida lokal pisá i ravaganan di bientu ora e disturbio pasa riba Boneiru, Kòrsou i Aruba mañan i den wikènt.

E chèns ku e ta un depreshon òf un tormenta e ora ei ta 70 porshento.

Servisio Meteorológiko di Kòrsou ta antisipá for di awe yobida fuerte ku por kondusí na inundashon. Ravaganan di bientu pisá tambe por okashoná daño signifikativo i ta atvertí doñonan di boto pa tene kuenta ku olanan haltu na kosta suit i kosta oeste.