ORANJESTAD – Den e promé mitar di 2022 Servisio di Impuesto di Aruba a registrá 3.129 pagadó di impuesto nobo. E kresementu nobo aki ta resultado di un kolaborashon estrecho ku diferente servisio, manera Ofisina di Registro Sivil, Kamara di Komersio i SVB.

E grupo mas grandi di pagadó di impuesto ta esnan ku mester paga impuesto di tereno. 1208 persona, ku anteriormente no a paga impuesto di tereno, mester hasi esei awor si. E grupo di pagado di impuesto ku mester paga impuesto riba ganashi di empresa ta 490 na tur.

Servisio di impuesto tin un departamentu spesial di Registrashon ku ta okupá su mes ku registrashon di partikulir- i empresanan. E departamentu mester optimalisá su registro kontinuamente pa ten’é al dia. Diariamente Servisio di impuesto ta risibí informashon pa registrashonnan nobo. Mayoria biaha ta risibí esaki di persona- òf empresanan, pero tin tambe otro fuente di informashon.

Por sosodé ku ta duna informashon anónimo di sierto persona òf empresa ku ta risibí entrada klandestino i no ta pagando impuesto riba esaki.

Ta start un investigashon  pa loke ta trata e personanan aki ku ayudo di por ehèmpel FIOT pa finalmente registrá esnan tambe ku no ta kumpli ku nan deber di paga impuesto.