ORANJESTAD – E Organisashon di salú mundial, WHO, a proklamá òktober komo luna di kanser di pechu, un kampaña ku ta bolbe tur aña pa hasi hendenan konsiente di konsekuensianan di kanser di pechu.

E meta ta pa pone atenshon i duna sosten pa detektá e malesa aki na tempu i mehorá su tratamentu.

Direktiva di Salubridat Públiko na Aruba ta duna algun rekomendashon pa prevení kanser di pechu. Ta pidi komunidat pa kome salú, evitá alcohol i hasi tur luna un tèst di pechu bo mes i un kòntròl serka dòkter di kas. Lo ta un bon idea tambe pa laga hasi un eco- òf mamografia riba instrukshon di dòkter.