ORANJESTAD – E landadó Rubiano di laman ganchu, Deaxo Croes, ta bai landa pa promé biaha su so entre e islanan ruman Boneiru i Kòrsou. 

E meta di e prestashon aki ta pa krea konsientisashon pa loke ta trata prevenshon di kanser i generá sèn pa tres fundashon ku ta dediká nan mes riba e islanan ABC pa prevenshon di kanser, kual nan ta CORESA Foundation Aruba, Caribbean Prevention Center Curaçao i  Kanker Fonds Bonaire. 

E evento ta karga e nòmber: Crossing for Prevention, referiendo na e evento di 2018, Crossing for Hope, kaminda Deaxo a landa huntu ku kuater miembro di tim di Venezuela pa Aruba i a rekoudá na tur 123.000 florin pa Koningin Wilhelmina Kanker Fonds Aruba.

Motivá pa e desafio i e tenshon di e prestashon, Deaxo ta spera di definí un biaha mas loke humanamente por pa medio di puru forsa, resistensia i perseveransia i na mésun momentu tresiendo inspirashon, motivashon i hopi alegria pa e hendenan na Aruba, Boneiru i Kòrsou.

E krusada ta un landá di masoménos 53 kilometer, kuminsando mei anochi for di e punta mas suit di Boneiru na e sitio di buseo Red Slave Huts/ Peleké, pa e punta mas pariba di Kòrsou.

Pa enfrentá e desafio aki, mester tene kuenta ku diferente faktor, manera kondishon di laman, posibilidatnan físiko di Deaxo, nutrishon adekuá i proseduranan di seguridat.

Un tim di 25 boluntario ábil i pashoná konsistiendo di dòkternan, un dietista, un entrenadó di laman ganchu, koredónan di kayak, landadónan ku ta kompañá i buseadónan, un ekipo di filmashon i tres boto di motor lo kompañá Deaxo pa hasi e krusada aki posibel.

E mayoria grandi di e grupo aki ta e mésun hendenan ku a kompañá Deaxo durante di su krusada Venezuela-Aruba. Nan presensia ta apsolutamente nesesario pa hiba e evento aki na un bon final.