ORANJESTAD – Turismo krusero na Aruba ta rekuperando bon, pero ta pará ainda binti porshento bou di e nivel di promé ku corona, Aruba Ports Authoritu, APA, ta informá. A base di e reservashonnan di e próksimo lunanan i e komienso di 2023 sinembargo e outoridatnan ta positivo.

Marc Figaroa, direktor di APA, ta rekonosé ku turismo ku ta hasi uso di avion ta rekuperá mihó di e pandemia ku e turismo krusero. 

Segun Marc Figaroa esei ta debi ku aviashon por a kuminsá bèk mas lihé ku e turismo di krusero despues di e pandemia. Entre fin di dezèmber 2021 i febrüari di e aña aki hopi kompania a anulá nan biahenan, pa motibu ku e impakto di e variante di Omikron tabata muchu grandi ainda.

First call’s

Diferente barku krusero ta yega Aruba pa promé biaha. Djasabra último Prima di Noruega a drenta haf di Oranjestad komo ‘first call’. APA ta spera ku Prima ta bolbe bini Aruba na luna di novèmber.

“No ta e promé barku krusero ku ta bishitá Aruba e aña aki pa promé biaha i e lo no ta e último barku tampoko”, Figaroa ta bisa.

E siman ku ta bini aki Aruba ta bolbe yama bonbiní na un ‘first call’, ku ta Carnival Spirit, di Carnival Cruise Line.  Riba programa tin tambe ‘first calls’ di Celebrity Beyond, Harmony of the Seas, Norwegian Encore i Azamara Onward.