ORANJESTAD – E entrenadó Arubiano di Meiden 011 di Haagse voetbalclub HVV Laakkwartier, Maricarmen Bikker, ta sali pa Kampionato Mundial na Qatar komo reportero.

E studiante Arubiano di 23 aña di Den Haag ta haña oportunidat serka TVDirect pa desaroyá su mes komo reportero. 

E tata di Maricarmen ta e konosido periodista deportivo Carlmichael Bikker na Aruba. “Via su konekshonnan ami ta haña e chèns aki awor. Mi ta bai sostené un kolega di televishon di Kòrsou. E ta hasi su trabou komo kamarógrafo i ami ta duna mi kontribushon na e reportahe komo entrevistadó ”, Maricarmen ta bisa un reportero di Voorburgsdagblad.

“Esaki ta un reto grandi i bunita. P’ami ta promé biaha ku mi ta eksperensiá un evento grandi asina komo reportero. Nos ta sali pa Qatar 15 di novèmber i ta keda en todo kaso tanten ku e Selekshon Hulandes ta aktivo einan”.