KRALENDIJK- Scholengemeenschap Bonaire (SGB) ta a kuminsá e proseso pa reklutá un presidente nobo di asina yamá College van Bestuurs (CvB). Esaki por dedusí for di avisona ku a kuminsá sali den diferente medio di prensa. 

E presidente di CvB na SGB, hunto ku un vice presidente, ta dirigí e operashonnan diario di e skol. Riba e CvB tin un Hunta di Supervishon (RvT) ku ta kontrolá e maneho hibá.

E búskeda di un presidente nobo di Kolegio di Direkshon a bira nesesario despues ku a sali na kla ku tabata tin diferensianan grandi den puntonan di bista entre e presidente saliente, Klaske van Apperloo, i e Hunta di Supervishon. E polítika di Van Apperloo a kausa situashonnan tenso na e skol, ku ta konta ku mas di 1000 estudiante i kuater departamento.

Mehorashon

Den último añannan a logra mehorashonnan signifikante den kalidat di edukashon, ku a resultá den informenan mas positivo di inspekshon di edukashon. Informashon tokante e posishon vakante ta disponibel onlain riba e wepsait di SGB.