KRALENDIJK – Dylan van Arneman di 26 aña a optené su diploma di VWO ku fasilidat na Liseo Boneriano. Despues el a bai studia na Amsterdam. Mientrastantu e tin su master kaba i awor ta promoviendo. We Connect a entrevist’é riba su karera di estudio.

Dylan ta eksplorá e kos di mas chikitu pa komprondé e kos di mas grandi. E ta promoviendo riba e tereno di físika supatómiko. “Nos konosé 5% di universo; tin hopi mas pa deskubrí.” Un kòmbersashon ku un talento Boneriano riba bunitesa di konosementu. 

Bonaire
Dylan tin un tata Boneriano i un mama Hulandes. Su kuna tabata na Amsterdam. Ora e tabatin kuater aña e famia a muda pa Boneiru. “Mi mayornan tabata traha ámbos den enseñansa i mi tata kier a bai bèk.”

Matemátika i Físika 

Dylan a pasa su VWO na Liseo Boneriano ku fasilidat i ku su 14 aña el a kuminsá deskubrí su pashon pa matemátika i físika. Materianan ku ta difísil pa hopi alumno, pero Dylan tabatin un bon dosente ku a hasi’é entusiasmá: “Bo por uz’é den bida real; kuantu ta dura pa laga un bala kai? Mi ke sa tur kos!”

Amsterdam

Durante e biahe di estudio  pa Hulanda den VWO 5 su eskoho a kai riba Amsterdam. “E úniko metrópolis ku un ambiente internashonal i e kombinashon bunita entre bieu i nobo.” El a inskribí mésora pa un kamber i por a biba henter su temporada di estudio na Campus di Diemen Zuid. E zomer aki e ta muda ku su mihó amigu pa Amsterdam Zuidoost. 

Idioma
Dylan mester a kustumbrá ku e Hulandes ku e mester a papia konstantemente na Hulanda. “P’ami e tabata un idioma formal ku mi tabata papia ku mi mayor- òf dosentenan. Mi mester a hasi  esfuerso pa ta mi mes i ekspresámi bon”. Na komienso el a keda den su ambiente Boneriano, pero via di e asosiashon di studiante el a haña amigunan Hulandes i internashonal.

Brak

Tambe e ekspeshonnan sosial tabata otro ku na Boneiru. Dylan ta menshoná e bebementu di serbes ku ta popular bou di studiantenan Hulandes. Awor e por hari pa esei; el a dominá entre otro un ekspreshon manera ‘brak zijn’ (lanta wayabá). “Bo no mester tin  miedu pa hasi algu nobo. Bai hasi deporte, purba siña balia, hasi algu!”

Promové
Pakiko promové, hasi investigashon, mientras e tin kaba master di Físika & Astronomia? Kuriosidat i tambe e plaser pa kompartí konosementu ku otro. Dylan ta promové na Universidat di Amsterdam (UvA) i na Nikhef, e Instituto Nashonal pa físika supatómiko. Na 2025 e ta spera di finalisá su promoshon, siguí pa un empleo komo dosente na un universidat ku espasio pa investigashon.

Yu di tera

Naturalmente su kurason ta bati pa Boneiru “pero e no ta pegá einan” Dylan ta agregá. E ta gusta inspirá otro i ta boga pa mas hende di koló bira aktivo den siensia. “Nos, personanan Karibense, tin otro bista riba mundu; e perspektivo ei tambe ta balioso”. Komo ehèmpel e ta menshoná e relashon ku otro dentro di famia òf komunidat.

Streanana
Ademas Boneiru ta un sitio fantástiko pa investigashon físiko. “Pensa riba e shelu yen di strea ku bo por kontemplá asina bon riba e isla. Òf e tantísimo piedranan magnétiko.” Básikamente, si ta pa Dylan, físika ta cool  i ta habri bo wowonan pa mundu. Laga e ta e embahador numa: “Ku sumo plaser mi ta keda involukrá ku Boneiru.”