AMSTERDAM – Peter R. de Vries Foundation ta duna un rekompensa di 100.000 euro pa e tep di oro riba e morto di Mike Venema, ku na 2018 a disparsé na Kòrsou ku su outo, un pikòp. Polis Hulandes ta laga sa djamars ku ‘despues di un investigashon ámplio’ den e kaso aki nan ta basa nan mes riba un krímen. E programa Opsporing Verzocht tambe a dediká atenshon na e kaso aki djamars anochi.

E hòmber di 53 aña a disparsé 12 di sèptèmber 2018. Riba 5 di yüli 2019 un sambuyadó ta haña su outo pa kasualidat den fondo di laman na Kòrsou. Su restunan mortal tabata eiden.

Segun un bosero di polis tin motibu pa dedusí ku aki tabata trata di un krímen. Hendenan den su besindario no tabatin indikashon ku Venema tabata depresivo i a resultá despues di su desaparishon ku su telefon selular nobo (e tempu ei) a disparsé.

Den Opsporing Verzocht e bosero a bisa ku hendenan kisas a pensa ku e hòmber tabata pudiente. E tabata bisti un oloshi Rolex falsu i e tabatin un iPhone nobo. “Probablemente einan e motibu ta sinta.”

Tambe e sitio kaminda a hañ’é den su outo ta un sitio, kaminda pa hende ku no ke hende kaweta, ta e lugá korekto, e bosero di polis a deklará.

A haña e pikòp na Shut. “Esei ta propiedat di aeropuerto, e ta aislá, tabata será pa basta tempu kaba na 2018 i tambe a pone un barera.”

Polis na Kòrsou i di Hulanda ta traha huntu den e investigashon. Entre otro pasobra ta ‘bien posibel ku aktualmente hopi hende, ku e tempu ei tabata keda na Kòrsou, ta biba na Hulanda awor i ku por konta algu di e kaso òf di Mike Venema,’ polis ta bisa. Polis ta pidi personanan ku ta di opinion ku nan sa algu di e kaso pa tuma kontakto.

Peter R. de Vries Foundation a pone un fecha límite pa e rekompensa: e tep di oro mester t’aden promé ku 29 di febrüari di otro aña. Peter R. de Vries Foundation ta e kontinuashon di e Stichting De Gouden Tip. De Vries a lanta e último aki pa rekoudá fondo pa e tep di oro den e kaso di desaparishon di Tanja Groen ku a disparsé na 1993. A tira riba De Vries riba 6 di yüli 2021 i el a muri riba 15 di yüli a konsekuensia di e heridanan.