KRALENDIJK – Tourism Corporation Bonaire (TCB) ta kontentu di por anunsiá ku a selektá un kandidato ambisioso mas, esta Ramso Coffy, komo e studiante mas resien ku a risibí un beka den kuadro di e Bonaire Tourism Scholarship Program.

Ramso lo kontinuá su estudio na MBO Boneiru pa logra su diploma di ‘All Around Tourism & Hospitality Medewerker’ (empleado ‘all around’ den turismo i hospitalidat). Su amor pa turismo el a ekspresá ku e siguiente palabranan: “For di chikitu mi a hasi bon kla ku mi ke bira ‘flight attendant’. Sabiendo ku mi no por studia pa esaki na nos isla mes, mi a skohe pa sigui e estudio di ‘All Around Tourism & Hospitality Medewerker’ na MBO Boneiru. Esaki tabata un bon opshon. Dentro di un aña mi a siña hopi kos, for di bendementu di un produkto te dunamentu di un tour ku real turistanan krusero. E oportunidat akí ta brinda mi e posibilidat pa krea un otro vishon pa mi mes riba turismo na Boneiru.’

Duna sosten

TCB i Guardian Group Fatum ta elogiá Ramso su dedikashon i perseveransia. E programa di beka pa estudio tin komo meta pa duna sosten na nos industria di turismo lokal i desaroyá un forsa laboral floresiente pa medio di brinda hendenan ku ta destaká manera Ramso e oportunidat pa engrandesé nan konosementu i abilidat.