KRALENDIJK –  E tim di kombatimentu di kalamidat di Boneiru huntu ku Curoil Depot Hato ta bai simulá un desaster ku kombustibel. E treinen di kalamidat riba eskala grandi akí den bisindario di Curoil Depot Hato ta tuma lugá riba djárason 13 di sèptèmber 2023 for di 14.30 or te 17.00 or.

Pa medio di simulá un kandela, e tim di kombatimentu di kalamidat ke trein nan aserkamentu di krísis den un forma mas realístiko posibel. Pa motibu di siguridat durante e treinen ta sera Kaya Gob. N. Debrot pa un parti na altura di Boat Yard te na Zhung Kong Supermarket. Lo pone un ruta di desviashon via Kaya Nijmegen, Kaya Den Haag, Kaya Diamanta i Kaya Breda. Mirando ubikashon di WEB den e asina yamá área di efekto di e treinen akí, e empleadonan di WEB lo tin ku bandoná tereno di WEB pa korto tempu.

Pa e treinen den práktika akí ta bai hasi uso di figurante pa aktua komo herido pa asina krea un treinen mas realístiko posibel. Mas aleu Kuerpo Polisial Hulanda Karibense (KPCN) i Kuerpo di Bombero Hulanda Karibense (BKCN) lo ta visibelmente presente. Krus Kórá lo duna sosten na e ambulansnan.

Cuijpers Consultancy ta organisá e treinen riba enkargo di entidat públiko Boneiru i Curoil. Tur aña e tim di kalamidat di entidat públiko Boneiru ta organisá un treinen di kalamidat riba eskala grandi pa ta bon prepará den kaso di un eventual kalamidat.