SCHIPHOL – KLM tin idea di saka su avionnan Boeing 777-200-, -300- i Airbus A330 for di e flota. Pero e pregunta ta keda ainda kua tipo nan remplasante ta bira, luchtvaartnieuws.nl ta informá.

E opinionnan riba e Boeing 787 i e Airbus A350, e dos kandidatonan potensial, ta varia. Aktualmente e kompania di aviashon tin e Dreamliner kaba den servisio. Último añanan sinembargo Boeiing tabata afektá pa problemanan ku e avion aki, entre otro pa loke ta trata mantenshon i kontrolnan di kalidat.

Pa e motibu ei, entrega na entre otro KLM, tabatin retraso. Na septèmber 2022 numa e kompania a risibí pa promé biaha den dos aña un 787-10. Sinembargo Ben Smith, CEO di Air France-KLM, i Ton Dortmans, hefe di Servisio Tékniko, ta keda partidario di e Dreamliner.

A350

Pero tòg tin zonido dentro di KLM ku mester kambia e flota pa A350. Anteriormente Air France-KLM a skohe pa kuater A350F-avion di karga. Ademas e fabrikante di avion Franses ta mira e avion komo un kompetidó serio pa Boeing riba merkado di karga.

Ku su motornan Rolls-Royce e ta emití menos CO₂. Ademas 70 porshento di e casco ta trahá di materialnan avansá di moda ku e peso inisial ta 30 tonelada ménos.

‘Ademas e A350 ta mas grandi tambe i por bula mas leu. Esei sigur ta importante den kuadro di posibel krempmentu di Schiphol. Naturalmente e departamento di mantenshon ta importante, pero nos ta gana mas tantu sèn ku bula’, segun un konosedó pa De Telegraaf.

Klaridat

Den un reakshon KLM ta deklará na e mésun korant ku e no a skohe ainda kua avion ta bai remplasá e djessinku avionnan 777 i e djesun avionnan A330. E lunanan benidero lo tin mas klaridat.

Anteriormente Maarten Stienen, COO di KLM, a laga sa na Up in the Sky ku en todo kaso no ta bai uza e avionnan 787 ku a bestèl awor pa remplasá e flota aktual.