KRALENDIJK – Riba djaluna 11 di sèptèmber 2023, tabatin e apertura ofisial di e estudio di dos aña pa bira polis na Hulanda Karibense. Durante e apertura, hefe di KPCN, Alwyn Braaf a yama bonbiní na e 24 agentenan aspirante. 

Despues e studiantenan a haña un introdukshon di loke por spera e dos añanan benidero. Esaki den presensia di e tim di maneho di kuerpo polisial (Korps Management Team (KMT), hefe di tim pa e área di Karibe di e akademia di polis, Rob Appelhof, kordinadó di estudio pa KPCN,  Lionel Vrutaal i e guiadónan di práktika ku lo guia i sostené e studiantenan durante e estudio. 

Pa klousurá e parti ofisial, e studiantenan a huramentá i e preparashon pa komienso di e estudio a kuminsá na mes momentu.

Nivel MBO-4

Bou di responsablidat di akademia di Polis di Hulanda, e studiantenan ta haña diferente konosementu di modulonan tokante supervishon, investigashon di delitonan/krímen i kon pa brinda yudansa den kaso di emergensia. E 24 agentenan aspirante lo sigui e estudio kompletu na Boneiru. Despues di dos aña, tur aspirante lo tin un diploma di polis riba nivel MBO-4, durante kua nan ta disponibel riba Boneiru, Sint Eustatius i Saba.