KRALENDIJK – Durante e siman di 4 di sèptèmber te 11 di sèptèmber a tuma lugá diferente insidente, entre kua aksidentenan unilateral, maltrato, ladronisia, pegamentu di kandela i detenshonnan pa motibu di violashonnan manera korementu bou di influensia i menasanan.

Riba 11 di sèptèmber un shofùr menor di edat a pèrdè kontrol riba stür, basha un palu di lus abou pa despues e outo bai para 50 meter mas leu i motibu pa koriente a kai afó den algun bario. A atendé ku e mucha hòmber na e sitio pa leshonnan leve ku el a risibí i el a haña un prosèsverbal pa korementu sin reibeweis. Esaki a sosodé riba Kaya Macario (Cai) Sint Jago.

Riba e mésun dia a hasi denunsia pa ladronisia for di un outo riba Kaya Prinses Marie. Tambe dos outo a kima riba tereno di un kas na Kaya Hulanda. Polis ta sospechá ku ta trata di pegamentu na kandela. 

Riba 10 di sèptèmber a hasi vários detenshon: a detené un hòmber di 25 aña pa motibu di maltrato di un hende muhé. A detené dos otro hòmber e mesun anochi ei despues di un bringamentu na un sitio di dibertishon na Hanchi Amboina.

Denunsia pa bandera Rusiano hòrtá 

Komishon Dia di Boneiru a hasi denunsia pa ladronisia di un bandera Rusiano ku tabata kologá na un palu di lus na Kaya Internashonal. A hòrta e bandera aki djaluna 4 di sèptèmber. Entidat Públiko di Boneiru a kologá e bandera na hotèl Courtyard-by-Marriott na honor di Dia di Boneiru. 

Korementu bou di influensia i otro faltamentu ku lei 

Durante e siman aki a hasi diferente detenshon pa motibu di korementu bou di influensia. Riba 9 di sèptèmber a detené un hòmber di 35 aña despues di un aksidente unilateral riba Kaya Internashonal kaminda e outo a bai resultá den matanan kant’i kaminda. Komo ku e shofùr no por a para stret i tabatin lenga pisá, a hasi tèst di aliento serka dje i a base di e resultado a detené. Tambe tabatin un detenshon di un hóben ku a falta ku e Lei di Obligashon di Identifikashon BES.

Riba 9 di sèptèmber a hasi denunsia di ladronisia for di un akomodashon turístiko na Kaya Yuma, kaminda a hòrta diferente artíkulo manera un lèptòp i sèn kèsh. E bibienda tabata na yabi, pero e bentana di kushina tabata habrí

Riba e mésun dia den kareda di 02.45 a detene un hóben di 16 aña pa faltamente ku Lei di Obligashon di Identifikashon BES. Un patruya di polis a señalá e sospechoso riba Kaya Nikiboko Zuid na momento ku e tabata kana kant’i kaminda tur na pretu bistí ku un kapushon riba su kabes. Na momento ku el a mira ku un outo di polis tabata kore su tras riba kaminda, el a kuminsá kore. El a para na un kas kaminda el a tira algu afó. A ordené pa mustra un identifikashon, pero no por a hasi esei. Seguidamente a listré en buska di su sédula i a haña solamente un laiter di kushina. A bai buska e loke ku el a tira afó i a resultá ku ta un máskara. A detené.

Durante e siman a tuma lugá diferente aksidente di tráfiko na diferente sitio na Boneiru. Tabatin un aksidente straño a tuma lugá entre un skuter i un kabritu riba Kaya Flor De Cuba.

Polis ta pidi un i tur ku por a mira òf tende algu ku por kontribuí na e investigashonnan pa tuma kontakto via number 715 8000 òf anónimo via e liña di tep 9310.