KRALENDIJK – Entrante 1 di òktober 2023 un reglamento di proseso nobo pa kasonan sivil ta drenta na vigor na e kuater kortenan den promé instansia di Aruba, Kòrsou, BES (Bonaire, Sint Eustatius i Saba) i Sint Maarten. Esaki ta konta tambe pa korte di apelashon. Ta trata di un areglo pa un ‘small claims’ spesial, ku ta ofresé un prosedura rápido i efisiente pa kobransanan te Naf 10.000 ($ 5.587). Esaki  ta ámplia e aksesibilidat pa e sistema hudisial pa e siudadano.

E prosedura di ‘small claims’ ta kuminsá ku un petishon ku e demandante ta entregá na sekretariado di korte. E petishon mester kumpli ku un modèl standarisá ku korte ta duna. Na momentu di entregá mester paga Naf 50.00 ($ 28).  Pa demandantenan komersial e montante ta dòbel. Kontrali na otro proseduranan stampia no ta nesesario. Ademas no ta obligatorio pa embolbí un abogado; tantu personanan komo empresanan mes por demandá. 

Despues ku a entregá e petishon wes ta apuntá un fecha pa tratamentu di e kaso. Korte  ta invitá e akusado pa e huisio via karta òf imeil. No tin gastu mará na e invitashon aki. E akusado tin oportunidat pa oponé por eskrito promé ku e huisio, pero esei no ta obligatorio. Durante di e seshon-‘small claims’ e wes ta sondea si un solushon amistoso ta posibel, òf si mester sigui un veredikto mésora. Si resultá ku e kaso ta muchu kompliká, wes ta referí esaki pa un seshon regular, loke tambe ta sin gastu pa e partidonan embolbí.

Banda di e areglo-‘small claims’ a pone tambe otro kambio  den e reglamentu di proseso pa mehorá i aselerá e proseso sivil. E reglamento di proseso nobo i e modèl di petishon nobo pa ‘small claims’ ta optenibel riba e sitio wèb di Korte Komun di Hustisia (www.gemhofvanjustitie.org/nieuws/publicaties).