KRALENDIJK – Ounke ya por a skucha spekulashon pa algún dia, JetAir Caribbean riba djamars a anunsiá ofisialmente ku nan lo bai reanudá buelonan entre Kòrsou i Boneiru. 

JetAir lo operá dos biaha pa dia buelo entre Kòrsou i Boneiru seis dia pa siman, ku un buelo mainta i un buelo atardi. Sinembargo, riba djasabra no tin buelonan. 

Riba djaluna, djarason i djabièrnè, e promé buelo ta sali 8:25 di mainta. Riba djamars, diawebs i djadumingu, e promé buelo ta sali 10:55 di mainta. E buelo di atardi ta sali tur dia, excepto djasabra, 6:20 di atardi. 

Karu

Ounke e buelonan aki ta un bon adishon na e opshonnan ku spesialmente ku EZ Air i Divi Divi Air ya ta trese, e pasashinan di JetAir Caribbean no ta barata. E tarifa mas abou pa un biaha di ida ta $125, kaminda ku pa e tarifa mas karu ta mester paga $145 pa un pasashi solamente di bai. Pa kambia un pasashi ya kumprá mester paga 75 dòler ku tambe ta relativamente karu kompará ku EZ i Divi Divi.  dE buelonan lo wordu operá ku un aparato ATR-42 Turboprop ku tin 48 stul na bordo.