KRALENDIJK – Boneiru ta sigui traha riba aumentá e kantidat di buelonan ku ta yega e isla. Diskushonnan kontinuo ta tuma luga, primordialmente dor di Tourism Corporation Bonaire (TCB), den koperashon ku entidadnan manera Bonaire International Airport (BIA). 

Esaki a keda revelá den un presentashon ku a tene djamars pa eksperto di aviashon Howard Mann, kende ta yuda Boneiru den atrai mas kompanianan aéreo pa e isla. Mann a enfatisá ku e diskushonnan no ta limitá nan na kompanianan nobo solamente; nan ta envolvé tambe partnernan di aviashon existente manera KLM, Tui, United Airlines i Delta Airlines. 

Mann a splika ku no ta tur ora mester enfoká solamente riba merkadonan nobo, e diskushonnan ta eksplorá tambe kon por koperá efektivamente òf generá mas kapasidat riba buelonan eksistente. 

Partnernan ta hopi positivo tokante e buelonan nobo di  WestJet ku ta kuminsá bula for di Toronto, Kanada stret pa Boneiur. Ounke inisialmente e buelonan ta wòrdu konsiderá komo buelo di  temporada haltu, tin speransa ku WestJet finalmente lo sigui bula duru durante hinter e aña. 

Bon prepará

Mann tambe a menshoná ku Boneiru ta bon prepará pa negosashon ku kompanianan aéreo, bisa, “Nos por demonstrá ku datonan konkreto tin un potensial grandi pa kompanianan aéreo nobo.” 

Tambe a menshona ku histórikamente ròutnan pa Boneiru ta kasi semper rentabel, lo kual ta un proposishon atraente pa kompanianan aéreo. Aunke e diskushonnan ku JetBlue ta kontinuando, tin optimismo ku e kompania di bòlet pa aire di kosto abou lo kuminsá tambe bula pa Boneiru.