WILLEMSTAD – Un sobrekargo nobo riba pasaheronan ku ta biaha for di Kòrsou riba avion, e asina yamá Passenger Safety Oversight Charge (PSOC), lo bai hasi biaha pa o for di Kòrsou un algu mas karu atrobe. 

Ta trata di un montante di 1 dòler i 73 sèn ku lo kuminsá kobra riba práktikamente tur pasahero ku ta sali for di Aeropuerto Internashonal di Kòrsou (CAP) for di dia promé di yanüari 2024. E sobrekargo  nesesario pa yuda kubra e gastunan di supervishon riba seguridat den aviashon dor di e Curaçao Civil Aviation Authority (CCAA). 

Diferente estudio a mustra ku e presupuesto ku CCAA ta risibí for di gobèrnashon lokal no ta sufisiente pa nan por ehekutá nan tarea debidamente. E base pa e tasa ta keda establesé den e Landsverordening luchtvaartveiligheidsheffing, ku entretempu a wordu akseptá pa Parlamentu di Kòrsou. 

No ta impuesto

CCAA ta enfatisá den nan komunikashon ku esaki no ta un impuesto. E fundnan ku ta ser kobrá pa medio di e sobrekargo lo ser usá kompleto pa e tareanan di CCAA. 

Basá riba e kantidat proyektá di pasahero pa 2024, lo bai kobra un suma di mas o ménos 2.473.912 florin Antiyano (poko ménos ku 1.4 miyon dòler Merikano) ku e sobrekargo nobo.