KRALENDIJK – Kuerpo Polisial Karibe Hulandes (KPCN) ta bisa ku lo kita baiskel for di muchanan ku ta kousando molèster den sentro di siuidat. Segun bosero di Polis ta bisa, a risibí vários keho tokante esaki. 

“Último tempu molèster dor di muchanan riba baiskel den sentro di siudat a oumentá. Molèster komo ku nan ta mustra komportashon iresponsabel den tráfiko dor di entre otro kore hòp, kore na grupo grandi mei mei di kaminda, kore sin lus i kore hasi kenshi mei mei di multitut, manera djadumingu tabata e kaso”.

KPCN ta enfatisá ku lo atendé di manera estrikto ku e komportashon aki i ku si ta nesesario, lo tuma medidanan ku ta kuadra. Komo ku mayoria biaha ta trata di muchanan menor di edat, KPCN ke hasi un apelashon na mayornan tambe pa papia ku e yu tokante su komportashon i e konsekuensianan ku esaki por trese kuné. Por ehèmpel ku daño na terseronan, material òf persona, ta kastigabel i por tin konsekuensianan finansiero. Pero tambe ku hasiendo esaki ta pone e seguridat di tantu otronan komo di e hóben mes na riesgo.

“Bo ta kousa molèster ku bo baiskel, e ora ei ta kita bo baiskel hib’é warda”, asina bosero di polis ta taha.