KRALENDIJK – Resientemente a reforsá e asina yama ‘biketeam’ di Kuerpo Polisial Hulanda Karibense ku sinku agente sertifiká. 

Banda di esaki KPCN a risibí tambe un total di seis baiskel nobo. Ku esaki a reforsá e asina yamá ‘bike team’ ku seis baiskel di polis rekonosibel dor di kua e kuerpo awor tin un total di dieskuater baiskel na su disposishon.  Pa e motibu aki por mira mas polis riba baiskel riba kareteranan di Boneiru. 

E ‘biketeam’ ta eksistí for di 2009 i ta un tim di agente polisial sertifiká ku a pasa diferente treinen spesial, duná dor di instruktor di ‘bike’ Suandy Clarenda, pa nan por aktua di manera adekuá den nan ròl di polis riba baiskel na momentu ku ta nesesario. Meta ta pa engrandesé e visibilidat di polis. 

Un di e benefisionan mas grandi ta ku e ‘biketeam’ ta hopi móbil; nan por bira rápido i por pasa fásil dor di multitut, hanchi i kayanan smal. P’esei e ‘biketeam’ ta ideal pa patruya durante di temporada di barku krusero òf otro aktividat kaminda tin hopi hende riba kaya. Na momento ku algu sosodé nan por move di manera fásil di un área pa otro área ku ta será pa outo òf kaminda outo no por yega fásil. Ademas nan ta bon visibel i  fásil pa aserka. Asina polis ta para mas serka di komunidat.

Regatta

Durante di e festival di Regata 2023 tambe e ‘biketeam’ lo ta aktivamente visibel riba kareteranan di Boneiru.