KRALENDIJK – Un shofùr deskabeyá tabata kousa  djasabra mèrdia na Boneiru pa polis tene un persiguishon intenso. E hòmber di 32 aña, no a duna oido pa para i kasi a alkansá un agente polisial. Probablemente e shofùr tabata bou di influensia di supstansianan narkótiko.

Durante un patruya polis a mira un outo ku tabata kore ku velosidat haltu riba Kaya Korona. Pa motibu di e korementu deskabeyá di e shofùr, e patruya mester a hala un banda pa evitá un choke. E shofùr a sigui kore ku velosidat haltu direkshon di e rotònde di Sùrnan di Roozendaal i a sigui pa Kaya Nikiboko Nort.

E patruya a pèrdè e vehíkulo for di bista i algun ratu despues a nota e outo ku velosidat halti den direkshon kontrali riba Kaya Kanari. Pa medio di lus giratorio polis a ordená e shofùr pa para mientras un agente a sali for di e outo di polis pa duna señal di para ku su man drechi.

Persiguishon 

E shofùr no a baha su velosidat i a sigui kore den direkshon di e agente polisial. E agente a hañ’é obligá pa bula un banda pa evitá ku e vehíkulo lo a alkans’é. E sospechoso a sigui kore i un biaha mas polis a pèrd’é for di bista. E patruya a sigui buska i a topa e vehíkulo un biaha mas na altura di Kaya Falcon. Aki nan a kuminsá un persiguishon.

Na altura di Kaya Barí, e sospechoso a kasi alkansá un persona ku tabata kana kant’i kaminda i a sigui kore. Na altura di Kaya Tambú e sospechoso a alkansá un outo ku tabata stashoná kant’i kaminda i a sigui kore. Finalmente e patruya a logra di pone e sospechoso para na altura di Kaya Marimba. A detené e hòmber di 32 aña ku inisialnan N.J.M.V. pa motibu ku e no a duna oido na demandanan di polis, atentado riba bida di un ámtenar den funshon i pa faltamente ku diferente leinan di tráfiko.

A konfiská e outo pa mas investigashon.