KRALENDIJK- Djabièrnè atardi a tuma lugá ponementu di e promé piedra i desvelo di bòrchi di e proyekto nobo di Fundashon FORMA na Kralendijk. 

E edifisio ta destiná pa ofresé formashon i edukashon na hóbenan i adultonan, ku un enfoke riba kursonan di kapasitashon manera handyman, spesialista di beyesa, karpinté, lasdó i elektrishèn. 

Durante e seremonia di apertura, Soraida Mensche, direktor di Fundashon FORMA, a destaká e importansha di e momentu pa nan fundashon ku ta celebra su 31 aña di eksistensia. E promé piedra a keda poni den onor di e promé direktor di FORMA, Toontie Nicolaas, ku su yu Anthony Nicolaas a realisá e akto simbóliko. 

Ludwig Balentin, presidente di e direktiva di FORMA, a expresá alegria ku nan logro i a indiká ku e edifisio nobo lo ta un nukleo sentralisá di edukashon i formashon pa hóbenan i adultonan. 

Danki na Nina den Heyer

Palabranan di gradesimentu a bai na Diputado Nina den Heyer pa su esfuerso pa inkluí Fundashon FORMA den e plan di konstrukshon di fasilidatnan eskolar na Boneiru. Pa 2024, nan tin plan pa kompleta e edifisio nobo i habri nan ofisinanan.