KRALENDIJK- Pasashi pa i spesialmente for di i bai Bonaire lo bira un tiki mas karu for di 1 di yanüari 2024, pasombra Aeropuerto Flamingo lo ahustá na tarifnan entrante e fecha ei. Ta trata tanto di gastunan pa baha na e aeropuerto (landingsgelden), komo un subida di e asina yamá Passenger Facility Charge (PFC), ku kada pasahero ta paga.

E PFC pa pasaheronan internashonal lo subi ku 1 dòler i 83 sèn. E suma nobo, ku ta konosí popularmente komo Airport Tax, lo bira 47 dòler i 42 sèn pa pasaheronan ku tin un destinashon internashonal for di e momento ei. Ounke ta trata di un suma basta grandi, mester bisa tambe ku e ta ainda basta mas abou ku e 63 dòler ku Curaçao Airport Partners (CAP) ta kobrando actualmente pa kada pasahero ku un destinashon internashonal.

E PFC pa pasaheronan lokal tambe ta bai subi. E tarifa nobo lo bira 14 dòler i 25 sèn, o sea un subida di 55 sèn pa pasashi. 

Por tin mas oumentu

Sinembargo, e luchthaven ta atvertí ku posiblemente lo mester sigui subi e tarifanan en transkurso di 2024. “Nos kier pidi atenshon pa e echo ku nos gobièrnu a anunsia rengelnan nobo relashoná ku un subida signifikante di salario mínimo na Boneiru, ku ta keda sperá pa mitar di aña 2024. Na e momentunan aki BIA ainda no sa kiko lo ta e konsekuensianan di e konsekuensianan di e kambionan aki. Aktualmente nos ta studiando esaki, pa determina e impakto di esaki”, asina direktor di BIA, Maarten van der Scheer, riba 22 di november a skibi den un karta na e kompanianan di aviashon ku ta sirbi e isla.