KRALENDIJK – Despues di vários luna di prueba, Bonaire International Airport (BIA) awor a pone e instalashon nobo di awa sushi den operashon kompletu. 

E instalashon aki ta diseñá pa entrega awa sushi di avionnan ku ta yega di manera kontrolá i trata promé ku e pasa pa sistema di kloaka di Water- en Energiebedrijf Bonaire N.V. 

Ku e instalashon aki, WEB por trata awa sushi di BIA awor na un manera adekuá. E konstrukshon di e instalashon di awa sushi aki, ta kuadra ku intension pa yega na un operashon mas sostenibel posibel pa Aerpuerto Flamingo. 

Ademas di pone e instalashon den operashon, BIA aktualmente ta trahando na preparashon pa krea un parke solar pa asina por suministrá nan propio energía. 

Kontentu

Direktor Maarten van der Scheer ta kontentu ku e logro suprayando esfuersonan konstante pa mehora i hasi e aeropuerto mas sostenibel. “Hopi bon, danki tur kolega, provedónan i nos kompania di hèndel di avion”, asina Van der Scheer a bisa.