AMSTERDAM – Buelo OR 395 di TUI for di Amsterdam lo yega Bonaire djadumingu mainta, na lugá di djasabra anochi. E Dreamliner tabatin un defekto tékniko ku a pone esaki sali lat.

Ora e avion a kuminsa taksi pa bai lanta buelo, a surgi un problema i e avion a mester bolbe bai bèk na e porta di salida. Finalmente, e buelo no a sali na e ora planeá di 1 or di atardi ora, sino mas o ménos 6 ora di atardi, ku un retardo di sinku ora.

Na bordo tin 297 pasahero, di kua 132 ku destinashon final ta Bonaire. TUI sinembargo a disidí pa no hasi e parada planeá na Bonaire, pero pa bula direktamente Kòrsou debí na e tempu di deskanso obligatorio di e tripulashon, i e echo ku Flamingo Airport no ta habri den oranan di anochi.

E 165 pasahero ku destino Kòrsou lo mester baha na Hato awe anochi banda 11 ‘or di anochi ora, miéntras ku e 132 pasahero pa Bonaire lo wòrdu alohá den hotèlnan na Kòrsou.

Pasaheronan na bordo di e Dreamliner ta bisa ku nan a keda na tera ku kasi sinku ora, pasobra tabatin problema ku un di e pòrtanan di e avion. Despues nan a mester pa tènk e avion di nobo. TUI mes no ta duna detaye tokante e tipo di desperfekto tékniko ku a pone e avion sali asina lat.

Ruta diferente

Tambe a hala atenshon ku e ku e avion no ta sigui su ruta normal via Inglaterra pa sigui den direkshon di Karibe. Na lugá di esaki, ela bai den dierekshon di Iselandia i via Groenlandia pasa banda oost di Merka pa bai Kòrsou. No ta konosí si e ruta diferente ta relashoná ku e problema tékniko ku a surgi.