KRALENDIJK –  Tabata un asuntu festivo. Djamars 12 di dezèmber e promé buelo di Toronto (Canada)  a yega Kralendijk. A risibí e buelo, ku tabata yen, ku hopi entusiasmo. Ta parse ku turistanan di Canada a haña kaminda pa Boneiru ku un buelo pa siman. 

Dentro di 4 ora i mei e buelo di Toronto a yega Kralendijk. E pasaheronan di e avion di Westjet WJA2550 a aterisá binti minüt mas tempran. Sinembargo e esfera na Aeropuerto Internashonal di Boneiru a keda festivo. Hopi hende a bini aeropuerto pa wak e avion ku a trese turistanan di Canada pa promé biaha Boneiru.

Dos bishitante kontentu a sali komo promé hende for di e terminal. Zane i Wendy Elliott ta bini Boneiru pa promé biaha. Nan a buk mésora ora ku nan a mira ku tin un buelo Toronto pa Boneiru. Wendy Elliott tabata kontentu ku e buelo, ku a bira spesial p’e: “Tabata un buelo agradabel. Tabatin asta un seremonia di apertura na Toronto, kaminda un delegashon di Boneiru tabata presente. Nos tabatin un dushi buelo. Un aña pasá nos kier a bini kaba akinan, pero e buelo tabata e tempu ei muchu largu”.

Pa Zane i Wendy e siman aki ta bira un siman di goso. Na Toronto e temperatura aktual ta -1 grado Celcius. Na Boneiru nan ke snòrkel, wintsùrf, kana i bishitá sitionan spesial ku no ta muchu turístiko. Wendy Elliott ta splika: “Mi no ta kere ku nos ta bai sambuyá. Pero nos tin gana di deskubrí diferente sitio akinan”.

Otro pasaheronan tambe tabata entusiasmá ku e posibilidat nobo pa bula pa Boneiru. Un di nan a konta Bonaire.nu: “Normalmente nos ta paga pa un buelo di Toronto pa Boneiru ku un tránsito na Merka alrededor di 1700-1800 dòler. Awor e ta hopi ménos. Awor nos ta paga alrededor di 800 dòler. I e buelo ta mas rápido”.

Merkado nobo

I enberdat normalmente turistanan mester ta di tránsito na Merka. E ora di buelo por bira e ora ei djeskuater pa binti ora. Ku e buelo nobo e ta solamente 4 ora i mei. Ta parse ku a habri un posibilidat nobo pa Boneiru pa atraé turistanan nobo. Direktor di Ofisina di Turista Miles Mercera tambe ta entusiasmá ku e desaroyo nobo: “Nos ta trahando ku diversifikashon di nos turistanan. Ku esei mi kemen ku nos ke buska merkadonan nobo. E enfoke no ta solamente riba Merka, Hulanda i turismo di buseo. Nos ta wak rònt di nos kaminda tin oportunidatnan. Tur hende a pensa ku nos ta pone solamente enfoke riba Sur-Amérika. Mi ta di opnion ku Nort-Amérika, pues Canada tambe, ta interesante pa Boneiru”.

Ku e promé buelo di Westjet ta parse ku a kaba ku un promé trayekto ku preparashonnan largu. Sinembargo Mercera ta pensa ku e proseso ta tumando lugá: “Ku buelonan dirèkt nos ta embolbí nos medionan di merkadeo. Pues nos lo hasi promoshon na Canada pa fakansinan na Boneiru. Si den futuro serkano otro paisnan ta bai bula dirèkt pa Boneiru? Esei no ta e kaso awor aki ainda. Mi ta kere si ku e merkado di Brazil i di Colombia ta interesante pa nos isla. Podisé esei ta un opshon pa futuro”. 

E avion di Westjet ta keda un anochi na Boneiru. Djarason 13 di dezèmber e tripulashon di Westjet lo hiba e avion Toronto bèk. No ta konosí si e avion tin mésun tantu pasahero abordo atrobe direkshon pa Canada.