KRALENDIJK – Kuerpo di bombero t’ei pa hende i pa bestia. Den kaso di kandela ta posibel ku no solamente e habitantenan, pero tambe un kachó a inhalá demasiado huma. 

P’esei, ora ta nesesario, kuerpo di bombero por purba reanimá e kachó tambe. Kuerpo di Bombero Hulanda Karibense (BKCN) – establesimentu Boneiru – a haña un entrenamentu introduktorio spesial di entrenadó Norbert Tadema Damman di DogPartner Bonaire.   

“Na Hulanda Karibense tin hopi kachó. P’esei, den kaso di kandela (den bibienda), e chèns ta grandi ku ainda tin bestia den e bibienda tambe. Sigur kachó. Hopi biaha, nan ta bai skonde ora tin kandela. Pa hende, un bestia di kas por ta manera un miembro di famia; p’esei tambe nan ke hasi tur loke ta posibel pa salba e bestia. Kuerpo di bombero por tin un papel importante den esei, i si ta nesesario, por reanimá e bestianan aki. P’esei tambe e entrenamentu introduktorio aki”, asina Tadema a splika. 

Number di alarma

Ora tin un bestia enbolbí den kaso di un kandela, òf tin un bestia na peliger por yama tambe e number di alarma ku ta 911.