KRALENDIJK – Duana di Boneiru a arestá dos pasahero, sospechá di kontrabanda di droga. Djabièrnè 29 di dezèmber funshonarionan di duana a deskubrí paketenan sospechoso den ekipahe di un hòmber ku a yega for di Hulanda. Su siguiente dia a atrapá un señora, prosedente di Kòrsou, ku droga durante un kontrol rutinario.

E pasahero maskulino a yega Boneiru ku un buelo di TUI. Durante kontrol duana a haña dos saku di plèstik, skondé den bleki di puiru pa feita. Tèst a mustra ku e kontenido probablemente tabata hasj ku un peso total di 200 gram. “Ta alarmante ku kontrabandistanan ta bira mas i mas kreativo den skonde supstansianan ilegal, segun un bosero di duana. 

Un dia despues a kontrolá un pasahero femenino ku a yega ku un buelo di Divi Divi. Funshonarionan di duana a haña un pildora ku tabata parse XTC i un supstansia koló di lechi ku a tèst positivo pa crystal methamfetamine. “Durante kontrol korporal a deskubrí ku e señora tabata karga den su kurpa un kondon prepará ku probablemente kokaina,” e bosero ta informá.

A entregá ámbos sospechoso na Marechaussee pa sigui ku investigashon.