KRALENDIJK – Aeropuerto internashonal di Boneiru a mira un rèkert di 436,914 pasahero ku a drenta i sali for di Boneiru den aña 2023. Esaki ta un subida di 3,1% kompará ku aña 2022, i 10,8% mas ku den aña 2019, e aña promé ku e pandemia di COVID. 

Den 2023 e total di pasaheronan pa nos hermana islanan manera Curaçao i Aruba a subi ku un total di 23,4% kual ta un total di 159.790 pasahero. Tambe a biaha algun miles di pasaheronan pa otro destinashon den region, manera por ehèmpel Repúblika Dominikana. Pasaheronan di Merka a keda stabil na un total di 84.852 den aña 2023. E kantidat di pasaheronan pa i for di Hulanda a baha ku kasi 8% na un total di 185.991, segun BIA un korekshon di merkadό después di e pik temporal rondo di e pandemia di COVID. 

Pa 2024 Bonaire International Airport (BIA) ta sperando un subida di e kantidat di pasaheronan, spesialmente di e region i pa e region Nortamérikano. Entro otro e ruta nobo for di Toronto i oumento den e kantidat di buelonan for di algun destinashon eksistente Merikano tambe ta aportá na esaki. Banda di esei aeropuerto ta trahando kontinuo pa mehorá eksperensia di su pasaheronan, kapasidat i e duradero di Aeropuerto Flamingo. 

Apresio

‘’Nos tin hopi apresio pa e aerolíneanan ku a kontekta nos isla ku region i otro parti nan di mundo den e añanan anterior. Espesialmente e aerolíneanan ku a kontekta Boneiru ku su hermana islanan a hasi un bon prestashon, i esei ta hopi importante pa nos komunidat. Huntu ku nos sosionan riba isla nos ta sigui traha pa mehorá e aeropuerto i e realisashon pa tin un  miho konekshon aéreo” direktor di BIA Maarten van der Scheer a bisa.