KRALENDIJK- Tin inkietut ta reinando bou di agentenan di Kuerpo Polisial di Karibe Hulandes (KPCN) pa motibu di un asina yamá  ‘dienstorder’ kaminda ta anunsiá ku e agentenan no por sigui karga nan arma regelmentario den nan oranan liber. 

Te asina leu, polis ku ta karga arma, por a tene nan arma di servisio huntu ku nan tambe den nan tempu liber, i inkluso por usa esaki, den situashonnan ku ta hasi esaki nesesario.  

No por wak e medida di parti di mando di KPCN lòs for di algun insidente resien, spesialmente riba e Islariba. Na Saba, un agente aparentemente bou di influensha di bebida stèrki algun siman atras a saka su arma di kandela na un fiesta, loke a kousa un gran indignashon den e komunidat. Poko dia despues, agentenan den nan ora liber na St. Eustatius a keda involví den un bringamentu den kaya na St. Eustatius. 

Sindikato

Sindikato NAPB-BES no kier a bai muchu den detaye ainda riba e medidia, pero a indiká sí ku nan no nesesariamente ta di akuerdo ku esaki. “Tin insidente ku ta tuma lugá tur dia, i no solamente den nos kuerpo, sino tambe den kuerponan di otro islanan i na Hulanda. Sinembargo, e insidentenan aki no a kondusí na un prohibishon similar manera esun aki na KPCN,” Thaise Isidora Lo-A-Njoe a bisa den un reakshon riba e emisora Live99.

E dirigente sindikal a bisa tambe ku e ta di opinion ku si agentenan di KPCN aktua robes, mester dil ku esakinan individualmente, na lugá di bin ku un medida general ku ta afektá tur polis ku sa karga arma.  

Interno

Un bosero di KPCN a konfirmá djabièrnè atardi ku en berdat un ‘dienstorder’ a wòrdu saká pa mando di KPCN, i ku nan ta para tras di esaki. E bosero a sigui bisa ku ta trata di un asuntu interno, ku tambe lo ser atendé den e Kuerpo mes. For di e mando di KPCN no a komuniká aktivamente na prensa tokante e desishon mes.