WILLEMSTAD – TUI, e lider di merkado riba tereno di buelonan di fakansi, ta agregá e wenter benidero buelonan di Bruselas pa Kòrsou na su skema di buelo. Ta ofresé e ruta nobo aki entrante 5 di novèmber dos bes pa siman, banda di e djeskuater buelonan semanal  for di Amsterdam pa islanan ABC.

E ekspanshon ta un reakshon riba e demanda kresiente di biahenan pa Kòrsou i ta ofresé klientenan di Bélgika i Hulanda e oportunidat di sali for di Bruselas.

Ta ehekutá e buelonan ku e TUI fly 787 Dreamliner ku ta konosí pa su komodidat. Pasaheronan por skohe entre tres diferente kategoria: Deluxe, Comfort i Economy i gosa di e ruta kombiná ku Punta Cana na Repúblika Dominikana. Esaki ta hasi posibel pa TUI ofresé tantu pakete di biahe komo pasashi pa Kòrsou so.

Por buk e buelonan di Bruselas pa Kòrsou entrante aprel, tantu riba e website Hulandes komo via agentenan di biahe Hulandes.