WILLEMSTAD – Den oranan tempran di djadumingu anochi Wardakosta di Kòrsou a hasi un kaptura èkstraordinario. A detektá riba radar un barku lokal, ku tabata nabegá direkshon di Kòrsou, i despues un unidat di Metal Shark di Wardakosta a intersept’é. E kontrol a deskubrí un lote poko komun: djesdos kaha yená ku bestianan eksótiko.

No tabatin e dokumentashon nesesario na bordo pa por importá e bestianan aki na Kòrsou, loke a kondusí  na konfiská e karga  inmediatamente. A pidi yudansa di servisio veterinario pa nan tuma e kuido di e bestianan konfiská riba nan.

E akshon aki ta enfatisá e aporte di Wardakosta, tambe pa protehá e flora i founa lokal i mantenshon di lei rondó di importashon i eksportashon di bestia.