ORANJESTAD – Wardakosta di Aruba a realisá un konfiskashon di droga supstansial i a arestá nuebe hende den un operashon serka di Aruba. Djabièrnè anochi a ripará un kontakto sospechoso riba radar i despues a uza un avion DASH i dos Metal Shark pa un inspekshon profundo.

Ora a aserká e barku sospechoso e personanan na bordo – nuebe Venezolano – a purba di tira material di prueba den laman. Danki na e akshon rápido di e personal di Wardakosta, ku ayudo di un helikòpter, por a saka e paketenan for di awa. Nan tabata kontené alrededor di 850 kilo di droga , entre otro kokaina i mariwana.

A resultá ku e personanan na bordo no tabatin nan dokumentonan ku nan i a detené nan i entregá nan na Polis di Aruba pa sigui atendé e asuntu.

Mientrastantu a destruí e droga ku a konfiská. Segun esnan enbolbí e éksito aki ta suprayá e efektividat di koperashon entre e diferente unidatnan di Wardakosta i outoridatnan lokal den e lucha kontra trafikashon di droga den e área di Karibe.