WILLEMSTAD/KRALENDIJK – E aerolínea Venezolano Albatros Airlines si tur kos bai bon, na komienso di aprel lo bai bula buelonan pa Jet Air Caribbean entre Kòrsou, Boneiru i Aruba. 

E buelonan lo wordu ehekutá ku un avion Embraer 120. Jet Air a trata di kuminsá ku buelonan regular spesialmente pa Boneiru den lunanan tras di lomba, pero sin muchu éksito. 

Un avion di tipo ATR ku e aerolínea tabatin na bista no a keda kla na tempu, mientras ku e buelonan usando un Saab 340 tampoko a resultá,m ya ku e avion en kuestion no tabata kumpli ku tur e rekisitonan di autoridatnan lokal.

Remarkabel

E skoho pa Albatros ta un poko remarkabel, mirando ku e kompania ya pa algun siman tin un avion pará na aeropuerto di Kòrsou sin por usa esaki, ya ku un kompania for di eksterior a pone beslag riba esaki pa kuentanan no-pagá. Ounke ku e avion ku lo bai usa riba e ruta pa Boneiru ta un otro tipo di avion, e situashon tòg ta tira un lus poko negativo riba stabilidat finansiero di Albatros.

Avion

E Embraer 120 ‘Brasilia’ ta un avion di ‘Turboprop’ ku tin 30 stul a bordo. E diseño originalmente tabata wòrdu konsiderá modèrno, pero ta trata di un avion ku ya no ta esnan mas yòn ni moderno.

E buelonan lo wòrdu ehekutá riba un base ‘wetlease’ ku ta nifiká ku Jet Air ta hür e avion di Albatros inkluyento triplashon, mantenshon i seguro.