KRALENDIJK – Un aksidente djadumingu anochi a resultá den morto di otro buriku hóben. E buriku, di masomenos 10 luna di edat, a keda alkansá pa un outo banda di 3 or i piku di mardugá. 

Segun Marina Melis, di Donkey Sanctuary Bonaire, esaki ta e 13 aksidente ku un buriku den tráfiko na Boneiru den e promé kuartal di aña 2024. Parse ku ta trata di otro i tantisimo kaso di di ‘hit en run’ na unda e automobilista inbolbí no a ni para pa wak kiko ela okashoná. No opstante ku pa Melis esaki ta e tantísimo biaha ku e ta mira e tipo di desgrasia aki, ainda e ta sintí su mes furioso ku kada kaso. 

“I ainda tin hende na Boneiru ku ta keda insistí ku e burikunan mester keda kana lòs i ku nos mester stòp di kue buriku pone na Donkey Sanctuary” Melis a fulminá. 

Berguensa

Melis ta bisa, ku ta kere ku esnan ku ta kousa e tipo di aksidentenan aki, mester sinti un berguensa di nan akto. Un velocidat muchu haltu, pero tambe stürmentu di outo ku alkohòl den kurpa hopi biaha ta involví den e tipo di aksidente aki. 

Kaya Korona pa e parti ei ya ta un kaya ku mal fama. Lamentablemente e korementu di forma iresponsabel aki no ta kousa morto di bestia so, pero ya a kousa vários morto di hende tambe riba e kaminda aki.