KRALENDIJK/WILLEMSTAD – Den último dianan por skucha hopi krítika di pasahero riba buelonan ku Jetair ta ehekutando pa Boneiru. 

E probleman tin di haber, entre otro, ku e problema ku kandela den un motor di e avion ku Jetair ta lease for di e kompania Albatros. E suseso ku a tuma lugá siman pasá a kondusí na vários retraso i kanselashon di buelo. 

Pero loke mas reklamo tin riba dje ta e echo ku Jetair no ta komuniká na tempu ku e pasaheronan en kestion ku ta presentá na airport pa skucha di e empleadonan di Swissport ku e buelo no ta sigui i a wòrdu kanselá. 

Vários pasahero ta reklamá tambe ku ofisinanan di Jetair ta sera 5 ‘or en punto i ta será tambe durante hinter wikent, di moda ku pasaheronan no tin idea mes di kiko lo pasa ku nan òf ki ora si por konta riba un buelo. 

Pasa nochi na Kòrsou

Tin bastahte pasahero a haña nan mes ta pasa nochi inboluntariamente na Kòrsou, pa motibu ku Jetair ta kanselá e úniko buelo di dia ku nan tin pa Boneiru. 

“Esta un kompania inútil. Promé nan a sigurá ku e buelo di mi kasá lo sigui, ounke sea mas lat. Ora mi kasá a yega aeropuerto personal di Swissport a bisele ku e buelo a kanselá, pero no tabata tin niun hende di Jetair pa dil ku e pasaheronan. Mi tin un konsehó: mihó evita di bula ku e hendenan aki”, asina kasá di un pasahero a skibi riba Social Media. 

“Un hende por tin un number di emergencia di Jetair?”, otro pasehero ta puntra. “Esta dushi no, kanselá buelo, primintí pa regla hotel pero despues nada. I niun hende no ta kontestá yamada despues di 5 ‘or”. 

No tin bosero

Jetair mes no a saka ningun komunikado tokante e suseso ku avion di Albatros. Es mas, e kompania ta difísil pa alkansá pa prensa tambe si tin pregunta.