Durante e simposio ku Association of Dutch Caribbean Economists (ADCE) a organisá riba 12 di aprel último tokante e dependensia di turismo na islanan ABC, a sali na kla ku un desaroyo proporshonal di fasilidat ta esensial pa turismo. Ekspertonan a enfatisá ku, ounke turismo ta keda e sektor ekonómiko mas importante, e kresementu aktual riba e islanan Boneiru i Kòrsou a kondusí resientemente na preshon riba naturalesa, kultura i komunidatnan lokal. Kontrali na Aruba, kaminda turismo eksagerá ta forma un rísiko, Boneiru ta aspirá un kresementu moderá pa mantené su karakter úniko.

Durante e enkuentro a papia tambe tokante e retonan den sektor turístiko, bou di kua e nesesidat pa infrastruktura i rekursonan humano mehorá. Tambe a sali na kla ku trahadónan lokal ta probechá insufisiente di e kresementu turístiko, di moda ku tin ku hasi apelashon mas i mas riba trahadónan djafó. Esaki tin influensia riba e demografia di e islanan.

E konklushon prinsipal di e simposio ta ku mas turismo, sin un ampliashon proporshonal di fasilidatnan, sosial-ekonómiko no ta duradero. Pa desaroyo turístiko duradero ta krusial ku gobièrnu ta pone atenshon pa i invertí den infrastruktura, medio-ambiente i servisionan komunitario na un manera ku e komunidat lokal tambe ta probechá di esaki i ku no ta ekskluí nan.

Plannan

E simposio a hasi un yamada pa implementashon aselerá di plannan di desaroyo i a enfatisá e importansia di enbolbimentu lokal i konservashon di e karákter úniko di kada isla, pa garantisá durabilidat sosial-ekonómiko. E partisipantenan a haña un bista profundo den e situashon aktual i pa futuro di turismo riba e islanan ABC pa medio di dato- i métodonan di midi ámplio.