KRALENDIJK – Ayera a habri e promé fase di e tereno nobo di stashoná outo na Plasa Brion. Ta mira esaki komo un paso importante pa aliviá e molèster di stashoná outo den sentro di siudat. Den e promé fase aki 64 lugá pa stashoná outo a bira disponibel, ounke e apertura tabata mas lat ku a plania.

Ta sigui awor ku e trabounan di di dos fase di e proyekto, kaminda ta bai konstruí 53 lugá mas pa stashoná outo. Ora e proyekto ta kompletamente kla, esaki lo ta un alivio grandi pa loke ta trata e problemanan di stashoná outo den un sentro di siudat ku hopi moveshon.

E entrada di e tereno di stashoná outo nobo ta na Kaya Hermandat. Tin dos salida: unu na Kaya Gilberto F. Croes i unu na Bulevar Julio A. Abraham.