KRALENDIJK – Despues ku Pakus di Pruga tabata será pa un periodo largu, nan ta habrí atrobe na un sitio nobo. Pakus di Pruga ta un marshe di produktonan segunda mano i tur entrada ta bai pa asilo di bestia di Boneiru.

E marshe popular aki ta ofresé un selekshon ámplio di artíkulo segunda mano, manera paña, muebles, buki i artíkulonan doméstiko. Tur hende ta bonbiní tambe tur djasabra pa pasa trese artíkulonan segunda mano. Kumprando of hasiendo donashon na Pakus di Pruga, bo ta kontribuí na e kuido pa bestianan den asilo di bestia di Boneiru.

Pakus di Pruga ta situá awor na Kaya Gilberto F. Croes, banda di Caribbean Laundry. E marshe ta habrí tur djasabra di 8’or di mainta te 3’or di mèrdia.

Yamada pa boluntario

Pakus di Pruga ta buska boluntario pa fortifiká e tim riba djasabra. Boluntarionan por yuda ku benta i surtimentu di produkto. Interesadonan por pasa djasabra òf tuma kontakto via medionan sosial pa mas informashon.