E organisashon di Derechonan Humano di Boneiru (BHRO) a amplifiká su yamada pa apoyo internashonal relashona ku e aneksashon illegal di Boneiru. James Finies lider di Pueblo Progresivo Uni i Davika Bissessar presidente di Bonaire Human Rights a partisipá komo invitadonan speaial na konferensia importante na Baku, kapital di Azerbaijan di 17 pa 18 yüli 2024, kaminda diskushonan krusial tokante kolonialismo i outodeterminashon a tuma lugá. 

E kapital di Azerbaijan, Baku e aña aki lo ta anfitrion di COP29 , e Konferensia di Nashonan Uní tokante Climate Change, un konferensia internashonal riba kambionan klimátiko kaminda kasi tur e 192 paisnan miembronan di nashonan uní i firmantenan na e konbenio na evento global lo partisipá na kuminsamentu di novèmber 2024.

E Grupo di Inisiativa Baku (BIG), fundá 6 juli 2023, durante e reunion ministerial di Movimiento di Paisnan No Aliñá, Non-Aligned Movement, tin komo un di su metanan pa promové koperashon internashonal kontra kolonialismo.

Durante e konferensia siman pasá na Baku, Azerbaijan, titulá “ Kongreso di Kolonianan Franses” Boneiru a djòin 15 organisashonan di teritorionan Franses manera Polinesia Franses, Nueva Caledonia, Martinique, Guadeloupe, Guyana Franses, Corsica I Saint Martin pa forma e “International Liberation Front”, un koalishon dediká na esfuersonan pa dekolonisashon. E Direktor Ehekutivo di Grupo di Inisiativa Baku, Abbas Abbasov a komprometé sosten na e trayektoria di Boneiru.

Esaki ta siguimento di un konferensia importante riba dekolonisashon i e “ròl di C-24 pa pone fin na kolonialismo” organisá pa BIG riba 20 yüni pasá na e sede di nashonan uní na New York, kaminda PPU i BHRO a partisipá, i ku tambe a atraé atenshon internashonal. E insidente a originá pa motibu di intimidashon hostil di e mishon di gobiernu Hulandes na nashonan uní ku a yama e mishon di nashonan unî di Azerbaijan kual a organisá e konferensia pidi nan pa para e delegashon Boneriano su partisipashon, pero sin éksito.

Den su diskurso na Baku, Finies, papiando Franses publikamente pa promé biaha, a pone aksento riba violashonan kontinou di e Charter di Nashonan Uní i vários tratadonan internashonal  dor di e gobierno Hulandes. E la hasi un yamada sinsero pa solidaridat, enfatisando riba e krisis humanitario urgente ku Boneiru ta enfentando, kaminda e populashon nativo den un dékada a wòrdu redusí te bou di 32% desde e kambionan estatal na 2010, menasando eksistensia di e pueblo nativo Boneriano.

Ophetivo

Vicky Bissessar a artikulá ku e ophetivo prinsipal di e lucha i trayektorio di Boneiru ta: pa restablesé Boneiru bèk riba lista di Teritorionan-Sin-Propio-Gobernashon di Nashonan Uni. E teritorio a wòrdu kitá for di riba e lista aki na aña 1955 sin konsentimento di e pueblo, i e rekonosimentu aki lo proveé protekshonan esensial bou di e artíkulo 73 di nashonan uní, salbarguardiando nan derechonan i nan desaroyo.

Sosten internashonal

BHRO ta sigui komprometé pa krea konsensia i buska sosten internashonal pa e kaso urgente di e pueblo di Boneiru, ku ta enfrentando un amensasa inminente di eliminashon kultural i demográfiko.