KRALENDIJK – Último añanan tin un kresementu di e poblashon di lionfish na Boneiru. Pa haña un mihó bista den e kaso aki nos a papia ku Paulo Bertuol, un eksperto riba tereno di opservá lionfish i Roxanne-Liana Francisca, biólogo marino di Stinapa. Segun nan COVID-19 lo tabatin un influensia negativo riba kombatimentu di e espesie aki rònt Boneiru.

Apesar di medidanan na Boneiru por papia segun konsehero ekológiko di Stinapa Paulo Bertuol di un aparente oumento den densidat di e lionfish. “Tin fluktuashon den densidat i nèt nos tin tres aña no usual tras di lomba,” Bertuol ta bisa. “Nos mester opservá mas tantu tempu i hasi mas test státiko pa por saka mihó konklushon.” E ta suponé ku e oumento por ta debí na kambionan den komportashon di yagdónan durante i despues di COVID-19. Hopi boluntario ku ta aktivo den industria di buseo despues di e pandemia ta muchu okupá ku turismo na lugá di bai yag riba lionfish. Tambe sierto restorant a stòp di ofresé lionfish riba nan menú.

Kurso i Sédula

E lionfish tin hopi spiña riba su lomba i bou di su barika ku ta hopi venenoso. Si bo mishi ku un di e spiñanan aki e por tin konsekuensianan doloroso i fastioso. E piská invasivo aki ta forma un plaga den Laman Karibe, pasobra e ta kome piskanan chikitu di riba ref. E piskanan aki ta esensial pa tene e koral rònt Boneiru sano i floresiente. Stinapa ta spera ku por tene e populashon bou di kontrol na momento ku bai yag aktivamente riba nan. Pa esaki bo mester sigui un kurso na un di e skolnan di buseo. Pa bo mes haña un ‘ELF” (un lansa spesial), bo mester hasi tambe un petishon na Stinapa. Bo mester mustra entre otro un Sédula pa esaki.

Fluktuashonnan

E informashonnan di Bertuol ta mustra ku e densidat di lionfishnan a subi di 38 piská pa hèktar den 2018 i 2019 na algu mas ku 50 piská pa hèktar den último tres añanan. Sinembargo e konsehero  no ke saka konklushonnan ainda: “Anteriormente nos tabatin añanan ku densidatnan paresido, manera 2011 i 2015,” e ta remarká. “Esaki ta mustra ku por tin fluktuashon.”

Den áreanan kaminda ta prohibí pa sambuyá, e densidat di lionfish ta mas haltu ku den áreanan kaminda por piska. “E kantidatnan a keda stabil e último tres añanan i asta a baha di 2020 te 2021, 2022 i 2023,” segun Bertuol. Pa haña e densidat mas chikitu tambe den áreanan kaminda no mag sambuyá, e ta sugerí pa hasi mas esfuerso den e áreanan kaminda si por fangu lionfish. “Keda yag aktivamente akinan”, ta su konseho.

COVID-19

Bertuol ta kompará e situashon na Boneiru ku otro áreanan den Karibe i ta konkluí ku e yagmentu riba koral ta efektivo. “E echo ku ya pa años e kantidat na Boneiru ta stabil ta un bon señal,” e ta bisa. E ta mustra tambe riba e influensia di e pandemia di COVID-19, ku a pèrkurá ku sambuyadónan lokal tabatin mas tempu pa sambuyá den 2020, i despues tabata hopi okupá atrobe ku turismo na 2021 i 2022. Pa 2023 e ta sospechá ku medidanan pa hasi e ref mas resistente kontra SCTLD (Stony Coral Tissue Loss Disease) tambe a hunga un ròl den e densidatnan mas haltu, spesialmente nort di Boneiru.

Biólogo marino di Stinapa Roxanne-Liana Francisca ta sostené e resultadonan di Bertuol i ta agregá ku mester warda riba e rapòrt kompleto pa por saka konklushonnan definitivo. “COVID aparentemente a hunga un ròl dor di kambia e komportashon i e frekuensia di e yagdónan, loke a influensiá e densidatnan di e lionfishnan,” e ta bisa.

Te na momento  ku e rapòrt kompleto ta disponibel, e pregunta ta keda habrí si e oumento di e populashon di lionfish na Boneiru ta un konsekuensia di fluktuashon natural  òf un kresementu mas permanente. Loke si ta sigur, ta ku e esfuerso di yagdónan lokal ta keda krusial den dominio di e tipo invasivo aki.

Konseho pa yagdónan 

Bertuol ta enfatisá e importansia di e aporte di boluntarionan: “Sigui ku e bon trabou i yag mas tantu posibel riba lionfish. Evitá di purba tira riba piská ku por skapa, pasobra esei ta duna nan miedu di yagdónan.”