Kralendijk- Boneiru ta bai haña un proseso di bakunashon akselerá pa por logra dominá e brote aktual di Covid i pa asina aliviá un preshon hopi grandi riba e sistema médiko di e isla.

Un promé paso den esaki ta un lote nobo di bakuna ku a yega Boneiru djamars atardi. Ta trata aki di 11.700 unidat adishonal di e bakuna di Pfizer. Segun sekretario di estado Paul Blokhuis (VWS) i hefe di e programa di bakunashon na hulanda, dr. Marc Sprenger, e situashon aktual ta un motibu dikon Hulanda a aprobá e petishon di gezaghèber Edison Rijna i Diputado Nina den Heyer pa manda mas bakuna, mas lihé pa Boneiru.

Seis dia pa siman

Un otro parti di e program ta, pa redoblá e kantidat di bakuna ku ta pasando awor pa dia, pa un kantidat di 500 bakuna. Pa por logra esaki, bakunashon lo tuma lugá 6 dia pa siman, na lugá di 5 dia pa siman. Efektivamente esaki ke men ku lo bakuná tambe riba djasabra.