KRALENDIJK – FIOD ku ta e instansia di investigashon di Servisio di Impuesto tambe pa Karibe Hulandes, bou di mando di Ministerio Públiko BES ta kondusiendo un investigashon penal di un kantidat di negoshi na Boneiru. E negoshinan aki no ta kumpliendo ku e legislashon di impuesto BES. 

E investigashonnan aki a kuminsá despues di un análisis di Servisio di Impuesto Karibe Hulandes di e deklarashonnan di impuesto. For di e análisis aki a bini dilanti ku a paga muchu tiki impuesto i ku no a kumpli ku e deber di informá i e deber di hasi atministrashon. 

Entrada hudisial
Siman pasá bou di mando di fiskal, den koperashon ku Kuerpo Polisial Karibe Hulandes (KPCN) i Mareshosé  (KMar) tabatin diferente entrada hudisial na diferente negoshi den Kralendijk. Na Hulanda tambe tabatin un entrada hudisial na bibienda di direktor di un di e negoshinan aki. Durante di e entrada nan hudisial a konfiská entre otro atministrashon, kòmpiuter i otro kargadó di dato. 

Durante siman ku a pasá diferente sospechoso i testigu a keda skuchá dor di reshèrshinan di FIOD.  E reshèrshinan aki a bini for di Hulanda pa efektuá e entradanan hudisial i kondusí e interogashonnan. Ministerio Públiko BES ta bisa ku e investigashonnan penal por a wòrdu prevení  si e negoshinan i e responsabelnan den e negoshinan aki a kumpli ku petishon i pregunta di Servisio di Impuesto na tempu.