Kralendijk- Miembro di Konseho Insular i lider di Partido MPB ta di opinion ku mester sera hende ku ta yega Boneiru ku un tèst di Covid falsifiká. Esaki Tjin Asjoe a trese dilanti den un reunion di Komishon Covid den Konseho Insular djarason anochi.

Tjin Asjoe a hasi su remarke despues ku gezaghèber Edison Rijna a bisa ku -te asina leu- ta djis nenga hende ku ta yega ku tèst di Covid falso entrada riba e isla.

“Na mi opinion esaki no por” asina Tjin Asjoe a bisa. Tjin Asjoe agregá ku hende ku ta yega ku tèst falsifiká ta empeligrá bida di otro hende. “No por ta, ku e úniko konsekuensia pa e hendenan aki ta ku nan no por drenta e isla, ora nan wòrdu gará ku un tèst falsu”.

Reto

Gezaghèber Rijna a bisa ku e ta komprondé sintimentu di Tjin Asjoe, pero ku tin hopi aspekto práktiko pa tuma na konsiderashon. “Si laga e hendenan aki drenta tòg, pa sera nan, esaki ta nifiká ku nan por infektá otronan den e proseso, manera hende ku tin ku transportá nan òf hende den prison. Si un hende yega ku un tèst falsifiká esaki ta nifiká ku e no ta kumpli ku e rekesitonan i simplemente ta mandele bèk”.

Tjin Asjoe a haña aporte di entre otro Clark Abraham ku ta di opinion ku no por djies manda hende bèk sin ku esaki tin konsekuensia pa e persona en kestion.

A hasi petishon na gezaghèber pa studie ku otro alternativa hudisial tin pa por atendé ku hende ku ta purba drenta e isla ku papel di tèst falsifiká mirando seriedat di e echo.