Kralendijk- Despues di notisianan for di Hulanda, kaminda pa di dos biaha a suspendé uso di a bakuna produsí pa e kompania AstraZenica, Gobièrnu di Boneiru a saka un komunikado enfatisando ku na Boneiru ta usa solamente e bakuna di Pfizer.

Gobièrnu di Boneiru a saka un komunikado konfirmando esaki, despues di a tuma nota ku sierto hende na Boneiru a kuminsá duda si nan ke bakuná òf no ora nan a skucha e notisia tokante e desishon pa no bakuná ku e bakuna di AstraZenica, spesialmente pa hende mas hoben ku 60 aña di edat.

Moderna

Kontrali na e situashon na Saba ku St. Eustatius ku a risibí e bakuna merikano Moderna, na Boneiru te asina leu a usa Pfizer so. Persona enkargá ku e program di bakunashon na Boneiru, Joey van Slobbe durante un reuda di prensa djaweps a bisa ku inisialmente no tabata kla si Boneiru lo a haña solamente e bakuna di Pfizer òf otronan tambe, pero te asina hulanda a manda diferente lote di Pfizer so.

“Pa nos tin vários bentaha si nos sigui risibí solamente Pfizer”, Van Slobbe a bisa, notando ku ya nan tin eksperensia ku uso di e bakuna aki, ku mester trata na un manera un tiki diferente, for di otro bakunanan, ku kada un tin su propio manera ku e mester wòrdu wardá i apliká.