KRALENDIJK – Djamars 17 di mei 2022 Prokurador-general di Kòrsou, Sint Maarten i di Boneiru, Sint Eustatius i Saba, Sr. Ton Maan, den presensia di Gezaghèber, Korpschef, kolega i partnernan den kadena hudisial, a hasi apertura di e edifisio renobá di Ministerio Públiko BES situá na Bulevar Julia A. Abraham 2.

Despues di e kambionan den struktura estatal na 2010, Saba i Sint Eustatius tambe a bira parti di parket Boneiru i esaki a trese kuné ku e espasio eksistente a bira muchu chikitu. Alabes dor di kresementu di e poblashon, e kantidat di kasonan di OM tambe a bira mas tantu. Pa e motibu aki a disidí pa añadí un parti na e edifisio eksistente.

Banda di rekonstrukshon di e parti eksistente a konstruí ofisinanan èkstra, un sala di reunion i un kushina. Na luna di òktober di aña pasá a inisiá e aktividatnan di konstrukshon. “Ta un alivio pa mira kon tur hende direpente por hala mas rosea i por move liber den e parti nobo ku ta pas hopi bon ku e parti bieuw” segun e PG.

Trabou duru

Promé ku e parti nobo a wordu inougurá dor di Ingeborg Coffy, e trahadó ku tim mas tempu trahando na OM, PG a tuma tempu pa gradisí tur ku a yuda hasi apertura di e edifisio posibel, spesialmente e departamentunan di IT i di Facilities ku a traha duru te lat den anochi pa tin tur kos kla pa apertura.

Trabounan di konstrukshon a keda ehekutá dor di Rijks Vastgoedbedrijf riba enkargo di Ministerio Públiko.