WILLEMSTAD- Parlamentario Sheldry Osepa a hasi vários pregunta na Minister di Hustisia pa ku e e situashon na Kuerpo Polisial di Kòrsou (KPC). 

“Ultimamente tin relativamente hopi agente polisial ku ta haña nan mes den man di hustisia. Den investigashon global ku mi a hasi den hurisprudensia mi a nota ku agentenan polisial ta haña nan mes envolukrá ku ‘passieve omkoping’, ‘schending ambtsgeheim’, ‘valselijk opmaken proces-verbaal’ i tambe ‘verduistering’. Den esaki nos por kòrda e kaso resien kaminda un agente polisial a bende informashon pa asina gèngnan rival por regla kuenta”, asina Osepa a trese dilanti.

E parlamentario ta referí tambe na e kaso kaminda un agente polisial tabata involkrá den e ladronisia di 600 kilo di kokaína. Den esaki soborno tabata wòrdu pagá tambe na empleadonan di Warda Kosta. E agente a wòrdu detené despues na Hulanda i ekstraditá pa Kòrsou.

Preokupante

Segun e parlamentario di PNP, e desaroyo akí ta preokupante. “Den pasado tabata tin un komishon ku a para ketu na e problemanan ku agentenan polisial ta konfrontá i ku ta hasi e agente vulnerabel. Un di e problemanan tabata nan maneho finansiero. Hopi di nos agentenan ta wòrdu preshoná pa hiba un estilo di bida ku nan no por paga. P’esei institutonan finansiero ta konsiderá polisnan na Kòrsou un di e gruponan di mas mal pagadó. Tambe un punto di atenshon ta e echo ku pa un agente hóben ta difísil yega na un propio kas. Un di e motibunan mas dikon agentenan polisial tabata desviá ta falta di supervishon dor di maneho di Kuerpo Polisial. E maneho talubidá ku kada agente polisial ku bai pèrdí ta un destrukshon di kapital enorme”,asina Osepa a sigui su karta. 

Pregunta

Segun Osepa Ministerio Públiko tampoko no ta sali liber mirando skarsedat di pèrsonal pa yuda mantené òrdu. Osepa a manda un total di 13 pregunta pa minister di Hustisia Shalton Hato.