KRALENDIJK – Den e temporada tras di lomba e departamentu di krímen sibernétiko di Kuerpo Polisial Hulanda Karibense a risibí vários notifikashon tokante ‘phishing’ via Facebook. 

‘Phishing’ ta tuma lugá ora un hende ta purba drenta den bo kuenta di Facebook dor di manda un mensahe sospechoso òf un link sospechoso pa bo, pidiendo bo pa suministrá informashon personal. Si un hende a haña akseso na bo kuenta, e por usa bo kuenta pa manda ‘spam’.

Por ehèmpel: Johan ta haña un meil ku un mensahe ku e mester subi su kuenta di Facebook pa lesa un mensahe importante tokante su kuenta. E link den e meil ta kondusí na un wèpsait ku aparensia straño ku ta pidi pa e hinka nòmber di usuario i kontraseña.

Mi ta kere ku mi ta un víktima di phishing. Kiko mi por hasi?

Si aksidentalmente bo a klek riba un link straño i bo a hinka bo nòmber di usuario i kontraseña, ta posibel ku un otro persona por haña akseso na bo kuenta. Bo por tuma, entre otro, e siguiente pasonan:

• Siña kon pa protehá bo kuenta dor di restablesé bo nòmber di usuario i kontraseña i deskonektá for di bo aparatonan ku no ta di bo, si bo por subi atrobe den bo kuenta.
• Si bo no por subi bo kuenta i bo nòmber di usuario i kontraseña no ta funshoná, bo por rekuperá bo kuenta.
• Lesa e informashon kon bo por chèk bo aktividat mas resien i kon bo por revisá meil di Facebook mas resien pa chèk si algu straño a tuma lugá den bo kuenta.
• Bo por reportá meil sospechoso na tur momento via [email protected].
• Informá polis via [email protected].

Kon mi por evitá di bira víktima di phishing?

Keda atento pa meil i mensahenan sospechoso

• No konfia mensahenan ku ta pidi pa sèn, ofresé regalo òf ku ta menasá di kita òf blòkia bo kuenta di Facebook.
• Meil  di Facebook tokante bo kuenta lo bini semper di fb.com, facebook.com òf facebookmail.com. Semper bo por bishita www.facebook.com òf habri bo Facebook-app pa wak si Facebook a manda bo mensahenan importante.

Nunka klek riba link nan sospechoso

• Si bo haña un meil sospechoso òf un mensahe sospechoso ku ta indiká di ta di Facebook, no klik riba e link nan òf anekso nan aki.

No kontestá e meilnan aki

• No kontestá mensahenan ku ta pidi bo pa bo kontraseña òf datonan di bo tarheta di krédito.

Haña aviso

• Haña aviso tokante akseso di kuenta no rekonosé i suich pa un verifikashon di dos nivel pa asina mehorá siguridat di bo kuenta.

Mas informashon? 

Manda un meil na [email protected]  òf yama 715 8000 i puntra pa e departamentu di krímen sibernétiko (cybercrime).